![Arıçı fermerlər təlimlərə cəlb edilib](https://smb.gov.az/storage/9301/1-(6).jpg)
Daşkəsəndə təlimləri uğurla başa vuracaq arıçı fermerlərə fərdi təsərrüfatlarının genişlənməsinə dəstək məqsədilə arı ailələri və müvafiq ləvazimatlar təqdim ediləcək.
30 mart-3 aprel tarixlərində “AzerGold” QSC-nin təşkilatçılığı, Kiçik və Orta Biznesin İnkişafı Agentliyinin (KOBİA) dəstəyi ilə Daşkəsən rayonunda ikinci ildir ki, həyata keçirilən “Arıçılıq təsərrüfatının inkişafına dəstək” layihəsi çərçivəsində fermerlər üçün təlimlər təşkil edilib.
Əsas missiyası Daşkəsəndə kiçik sahibkarlıq ekosisteminin inkişafına, arıçılığın təşviqinə və təbii bal istehsalının artırılmasına töhfə vermək olan təlimlər 3 gün davam edib. Daşkəsən rayonunun Çovdar, Bayan, Quşçu kəndləri və Şadax yaşayış məntəqəsində fəaliyyət göstərən 32 fermerə layihə çərçivəsində cəlb edilmiş məsləhətçilər tərəfindən arılara qulluq, beçələmə və ana arıların yetişdirilməsi qaydaları barədə təlimlər keçirilib. Proqram çərçivəsində, həmçinin arıçılığa ziyan vuran xəstəliklərin müalicə və profilaktikası istiqamətində məlumatlılığın artırılması məqsədilə metodiki təlimat bukletləri paylanılıb.
Bununla yanaşı, KOBİA-nın Gəncə KOB İnkişaf Mərkəzinin cəlb etdiyi ekspertlər tərəfindən təlim iştirakçılarına sahibkarlığın inkişafı istiqamətində həyata keçirilən tədbirlər, biznes fəaliyyəti üçün yaradılmış əlverişli mühit, sahibkarlıq subyektlərinə səmərəli maliyyə dəstəyinin göstərilməsi mexanizmləri haqqında ətraflı məlumat verilib. Arıçılar üçün maliyyə resurslarına çıxış, subsidiyaların verilməsi, aqrar sığorta işinin təşkili mövzularında seminarlar təşkil edilib.
Layihənin növbəti mərhələsində arıxanalarda baytar-sanitar qaydalara uyğun işlərin aparılması, arı ailələrinin məhsuldarlığının və davamlılığının artırılmasına dair təsərrüfat şəraitində praktik məşğələlərin keçirilməsi nəzərdə tutulur. Təlimləri uğurla başa vuracaq kənd sakinlərinə sertifikatlar, fərdi təsərrüfatların genişlənməsinə dəstək məqsədi ilə arı ailələri, o cümlədən müvafiq ləvazimatlar təqdim ediləcəkdir.
Powered by Froala Editor