Qazaxıstanın ticarət missiyasının Bakıya səfəri çərçivəsində hər iki ölkənin iş adamlarının və müvafiq qurumlarının iştirakı ilə Azərbaycan-Qazaxıstan biznes forumu keçirilib.

Tədbirdə Qazaxıstanın ölkəmizdəki səfiri Serjan Abdıkarimov, “QazTrade” ASC-nin baş direktoru Azamat Asgarula, Qazaxıstanın Standartlaşdırma və Metrologiya İnstitutunun baş direktoru G.M.Muxambetov və digərləri çıxış edib, iş adamları arasında ikitərəfli görüşlər keçirilib.

Biznes forumdakı çıxışında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov ölkələrimiz arasında iqtisadi-ticarət əlaqələrinə, KOBİA-nın biznesə dəstəyinə və əməkdaşlığın genişləndirilməsi perspektivlərinə dair fikirlərini bölüşüb. Qeyd olunub ki, Agentlik Qazaxıstanın müvafiq qurumları, o cümlədən “Damu” Sahibkarlığın İnkişafı Fondu ilə əməkdaşlıq edir. KOBİA yerli KOB-lar ilə potensial xarici tərəfdaşlar, o cümlədən Qazaxıstandan olan iş adamları arasında əməkdaşlığın inkişaf etdirilməsi üçün də çalışır. Qazaxıstan iş adamları Azərbaycana investisiya qoyuluşu, yerli tərəfdaşların tapılması üçün KOBİA-nın müxtəlif dəstək və xidmətlərindən istifadə edə bilərlər. 

Məlumat üçün bildirək ki, Azərbaycana səfər çərçivəsində Qazaxıstanın ticarət missiyası bir sıra ticarət şəbəkələrində olacaqdır.  

Powered by Froala Editor