70-dən çox qadın sahibkarın iştirak etdiyi layihə çərçivəsində iştirakçıların inkişafının dəstəklənməsi üçün təlimlər, ofis və istehsalat ziyarətləri, işgüzar görüşlər və digər tədbirlər təşkil edilib.

Kiçik və Orta Biznesin İnkişafı Agentliyi (KOBİA), “Marsol Group” və İş adamları Cəmiyyətinin Milli Assosiasiyasının (İCMA) birgə təşkilatçılığı ilə ikinci dəfə təşkil olunan "Uğurlu tərəfdaşlıqda xanım sahibkarlar" layihəsi başa çatıb.

Müxtəlif sektorları təmsil edən 70-dən çox qadın sahibkarın iştirak etdiyi layihə çərçivəsində təlimlər, ofis və istehsalat ziyarətləri, dövlət qurumlarında görüşlər, master klasslar və digər tədbirlər təşkil olunub. Layihənin məqsədi qadın sahibkarların işgüzar əlaqələrini genişləndirmək, onların biznes biliklərini artırmaq, qadın sahibkarlar arasında əlaqələri genişləndirməkdir.

Layihənin yekunlarına həsr olunmuş tədbirdə layihənin təşkilinə dəstək göstərən təşkilatların nümayəndələri və layihədə iştirak etmiş qadın sahibkarlar qatılıblar. Tədbirdə KOBİA-nın İdarə Heyəti sədrinin birinci müavini Natiq Həsənov və İCMA-nın İdarə Heyətinin sədri, “Marsol Group”un təsisçisi Tural Mustafayev ölkəmizdə qadınların sahibkarlıq fəaliyyətinə təşviq olunması, biznesin qurulması və inkişafına göstərilən dövlət dəstəyi tədbirləri, eləcə də layihə çərçivəsində görülən işlər barədə məlumat veriblər. Qeyd olunub ki, layihə qadın sahibkarların bilik və bacarıqlarının artırılması, bizneslərinin daha da genişləndirilməsi və onlar arasında biznes əməkdaşlığının qurulmasında uğurlu platformalardandır. Növbəti illərdə də layihənin davam etdirilməsi nəzərdə tutulur. 

Sonra layihədə iştirak edən qadın sahibkarlara sertifikatlar və hədiyyələr təqdim edilib. 

Qeyd edək ki, “Kapital Bank”, “Esen Tekstil”, “Nur Collection”, “Soel Parfum” və “Sharaf Media” layihənin tərəfdaşları və dəstək göstərənləri sırasındadır. İlk dəfə 2024-cü ildə start verilmiş layihə çərçivəsində ötən il 70-dən çox qadın sahibkarın inkişafını dəstəkləyən tədbirlər həyata keçirilib. 

Powered by Froala Editor