Şərq Tərəfdaşlığı ölkələrində Avropa İttifaqının Kiçik Biznes Aktına uyğunluğun qiymətləndirilməsi layihəsi olan “Kiçik və Orta Sahibkarlıq Siyasəti İndeksi”nin (“SME Policy İndex”) icrası ilə əlaqədar tədbir keçirilib.
Şərq Tərəfdaşlığı ölkələrində Avropa İttifaqının Kiçik Biznes Aktına uyğunluğun qiymətləndirilməsi layihəsi olan “Kiçik və Orta Sahibkarlıq Siyasəti İndeksi”nin (“SME Policy İndex”) icrası ilə əlaqədar tədbir keçirilib.
İqtisadi Əməkdaşlıq və İnkişaf Təşkilatı (İƏİT) və İqtisadiyyat Nazirliyinin dəstəyi, Kiçik və Orta Biznesin İnkişafı Agentliyinin (KOBİA) təşkilatçılığı ilə keçirilmiş tədbirdə müvafiq dövlət qurumlarının, özəl sektorun, İƏİT və Avropa Yenidənqurma və İnkişaf Bankının nümayəndələri, eləcə də bir sıra səfirlik və beynəlxalq təşkilatların təmsilçiləri iştirak ediblər.
Tədbirdə çıxış edən İqtisadiyyat, Elm və Təhsil nazirliklərinin, Mərkəzi Bankın, KOBİA-nın, Antiinhisar və İstehlak Bazarına Nəzarət Dövlət Xidmətinin, İxracın və İnvestisiyaların Təşviqi Agentliyi - AZPROMO və digər qurumların nümayəndələri KOB-lara göstərilən dəstək tədbirləri, bu sahədə mövcud tənzimləmə siyasəti barədə məlumat verib, “SME Policy İndex” üzrə qiymətləndirmənin kiçik və orta biznesin inkişafı sahəsində fəaliyyətin inkişaf etdirilməsində əhəmiyyətli olduğunu qeyd ediblər.
“SME Policy İndex” hər 4 ildən bir İƏİT tərəfindən Şərq Tərəfdaşlığı ölkələri üzrə sorğu keçirilməklə müəyyən edilir. Növbəti mərhələ üçün Azərbaycan üzrə “SME Policy İndex”in müəyyənləşdirilməsi məqsədilə aidiyyəti dövlət qurumları tərəfindən sualların elektron platforma üzərindən cavablandırılması təmin olunub. Sorğu üzrə suallar rəqəmsal iqtisadiyyat, müflisləşmə və sağlamlaşdırma, KOB-ların bacarıqları, institusional tənzimləmə və əməliyyat mühiti, dövlət satınalmaları, standartlar və tənzimləmələr, KOB-ların beynəlmiləlləşdirilməsi, innovasiyaların tətbiqi, KOB-lar və startapların dəstəklənməsi, sahibkarlıq sahəsi üzrə insan kapitalı, maliyyəyə çıxış, KOB-ların “yaşıl iqtisadiyyat”da rolu və s. mövzuları əhatə edir.
“SME Policy İndex” KOB-lar üzrə siyasətin hazırlanması və həyata keçirilməsi prosesinin Avropa İttifaqı ölkələrinin və digər qabaqcıl beynəlxalq təcrübələrlə müqayisədə qiymətləndirilməsinə imkan verən alətdir. Qiymətləndirmə Avropa İttifaqı, Avropa Yenidənqurma və İnkişaf Bankı və Avropa Təlim Fondu ilə birgə İƏİT tərəfindən hazırlanıb və 2012-ci ildən etibarən Şərq Tərəfdaşlığı ölkələri də daxil olmaqla 5 region üzrə həyata keçirilir.
Powered by Froala Editor
