KOBİA, Türkiyənin Beynəlxalq Nəqliyyatçılar Dərnəyi, AGTL və KOB Xarici İqtisadi Fəaliyyətinə Dəstək Operatoru Azərbaycan və Türkiyə arasında beynəlxalq daşımalar üzrə əməkdaşlığın genişləndirilməsinə dəstək məqsədilə Anlaşma Memorandumu imzalayıblar.
“Bakı KOB evi”ndə Kiçik və Orta Biznesin İnkişafı Agentliyi (KOBİA), Türkiyənin Beynəlxalq Nəqliyyatçılar Dərnəyi, Azərbaycan Gömrük Təmsilçiliyi və Logistika Şirkətləri Assosiasiyası (AGTL) və KOB Xarici İqtisadi Fəaliyyətinə Dəstək Operatoru (XİFDO) arasında əməkdaşlıq haqqında Anlaşma Memorandumu imzalanıb.
Sənədi KOBİA-nın İdarə Heyətinin sədri Orxan Məmmədov, Türkiyənin Beynəlxalq Nəqliyyatçılar Dərnəyinin vitse prezidenti Fatih Şener, XİFDO-nun icraçı direktoru Kamran Həbibov, AGTL-in icraçı direktoru Vüsal Qasımov imzalayıblar.
Anlaşma Memorandumu Azərbaycan və Türkiyə arasında beynəlxalq yük daşımaları üzrə əməkdaşlığın genişləndirilməsini, bu istiqamətdə əlaqəli məsələlərə birgə dəstəyi, eləcə də hər iki ölkənin daşıyıcılarının və KOB-ların xarici iqtisadi fəaliyyətinə köməyi nəzərdə tutur.
İmzalanma mərasimi çərçivəsində həmçinin tərəflər arasında görüş keçirilib, müvafiq Anlaşma Memorandumundan irəli gələn məsələlər və əməkdaşlıq imkanları müzakirə edilib.
Powered by Froala Editor
