5 dekabr Beynəlxalq Könüllülər Günüdür.

Ölkəmizdə fəaliyyət göstərən könüllü hərəkatına öz töhfəsini verən qurumlardan biri də Kiçik və Orta Biznesin İnkişafı Agentliyinin (KOBİA) “KOB könüllüləri”dir. Agentlik yarandığı gündən könüllülərlə sıx əməkdaşlıq edir, qurumda “KOB könüllüləri proqramı” həyata keçirilir.

“KOB könüllüləri” proqramı gənclərə, xüsusilə də idarəetmə, biznes və menecment ixtisasları üzrə təhsil alanlara müvafiq sahədə bilik və bacarıqlarını, dünyagörüşünü artırmağa, ilkin əmək vərdişlərinə yiyələnmələrinə dəstək olur. “KOB könüllüləri” KOBİA-nın inzibati binasında, Agentliyin Bakı şəhəri və regionlarda fəaliyyət göstərən KOB dostu ofislərində, KOB evlərində gündəlik iş prosesində yaxından iştirak edirlər. 3 ay davam edən könüllü fəaliyyətini uğurla başa vuran gənclərə KOBİA tərəfindən sertifikatlar verilir ki, bu da onların iş həyatına uğurlu keçidinə fürsət yaradır.

2023-cü ildə 150-ə yaxın gənc, indiyədək isə 630-dan çox gənc KOBİA-da könüllü fəaliyyətinə cəlb olunub.

Könüllü fəaliyyəti, həmçinin, Agentlikdə işlə təmin olunmaq üçün də imkan yaradır. Könüllülük müddətində öz aktivliyi, təşəbbüskarlığı ilə seçilən 14 könüllü KOBİA-da işlə təmin edilib. 

KOBİA-da könüllü olmaq istəyən gənclər Agentliyin www.smb.gov.az rəsmi internet səhifəsində "KOB könüllüsü ol” bölməsində qeydiyyatdan keçməlidir. Bu bölməyə daxil olan müraciətlər dəyərləndirilir və könüllülərə dair seçim meyarlarına uyğun gələn namizədlər könüllü fəaliyyəti üçün KOBİA-ya dəvət olunurlar. 

Powered by Froala Editor