KOBİA

Biz Azərbaycanın sosial-iqtisadi inkişafını bilavasitə sahibkarlıqla, onun inkişafı ilə bağlayırıq

Şəkidə keçirilən “KOB FEST” sərgi-satış yarmarkasında 70-dən çox KOB subyektinin məhsul və xidmətləri sərgilənir Sahibkarların iştirakı ilə ətraf mühiti idarəetmə sistemlərinə dair tədbir keçirilib Sahibkarların mikro, kiçik, orta və ya iri sahibkar kimi müəyyənləşdirilməsi üçün hansı meyar əsas götürülür? Bu ilin birinci yarısında KOB evlərində sahibkarlara 200 mindən çox xidmət göstərilib KOBİA nümayəndələrinin İspaniyaya səfəri çərçivəsində bir sıra görüşlər keçirilib Yerli bizneslər ESG və “yaşıl gündəliyə” hazır olmaq üçün nə etməlidir? Mindən çox KOB subyekti, startap və biznesə başlamaq istəyən şəxsə sahibkarlıq sahəsində təlim və məsləhət xidməti göstərilib “Startap” şəhadətnaməsi kimlərə verilir? Bursa Ticarət və Sənaye Palatasının nümayəndələri ilə görüş keçirilib Daha 10 KOB subyektinə “Startap” şəhadətnaməsi verilib

KOBİA və USAID arasında Anlaşma Memorandumu imzalandı 08.07.21

Kiçik və Orta Biznesin İnkişafı Agentliyi (KOBİA) və ABŞ-ın Beynəlxalq İnkişaf Agentliyi (USAID) arasında kiçik və orta sahibkarlıq sahəsində əməkdaşlığa dair Anlaşma Memorandumu imzalanıb. Sənədi KOBİA-nın İdarə Heyətinin sədri Orxan Məmmədov və USAID-in Azərbaycan üzrə missiyasının direktoru Caydev Sinqx imzalayıblar.

İmzalanma mərasimində ABŞ-ın Azərbaycandakı səfiri Li Litzenberqer də iştirak edib.

Sənədə əsasən KOBİA və USAID daha əlverişli və rəqabətli biznes mühitinin yaradılması istiqamətində birgə təşəbbüslər həyata keçirəcək, yerli KOB-lara məhsuldarlığı, gəlirləri və keyfiyyəti artırmaq, satış bazarlarını şaxələndirmək imkanı verən, eləcə də “COVID-19” pandemiyası kimi böhranlı vəziyyətlərə qarşı dayanıqlığı gücləndirən tədbirləri dəstəkləyəcək. Birgə əməkdaşlıq çərçivəsində KOBİA və USAID Azərbaycanda fəaliyyət göstərən mikro, kiçik və orta sahibkarların rəqabətliliyinin, biznes assosiasiyaların potensialının gücləndirilməsini, ölkəmizə innovativ biznes texnologiyalarının gətirilməsini də diqqət mərkəzində saxlayacaqdır.

“KOBİA yerli KOB-ların inkişafı üçün qabaqcıl təcrübənin öyrənilməsinə, bu sahədə müvafiq təşkilatlarla əməkdaşlığa xüsusi əhəmiyyət verir. İnanırıq ki, USAID ilə imzalanmış Anlaşma Memorandumu da biznes tərəfdaşlığının inkişafına, KOB-lara göstərilən dəstək və xidmətlərin daha da yaxşılaşmasına, KOB-ların böyüməsinə öz müsbət töhfəsini verəcəkdir” – deyə KOBİA-nın İdarə Heyətinin sədri Orxan Məmmədov qeyd edib.

“ABŞ və Azərbaycan şirkətləri arasındakı biznes tərəfdaşlığı və əlaqələri qarşılıqlı dostluq münasibətlərinin gücləndirilməsi və iqtisadi artımın təmin edilməsi baxımından böyük əhəmiyyət kəsb edir. Ümid edirik ki, bu anlaşma memorandumu birgə inkişafa şərait yaradan biznes tərəfdaşlıqlarının qurulması ilə nəticələnəcək” - deyə ABŞ-ın Azərbaycandakı səfiri Li Litzenberqer bildirib.

“USAID belə hesab edir ki, kiçik və orta sahibkarlıq inkluziv və dayanıqlı iqtisadi inkişafı təmin etməklə yoxsulluğun azaldılmasında müstəsna rol oynayır. Ona görə də kiçik və orta sahibkarları dəstəkləmək və onlar üçün əlverişli biznes mühiti yaratmaq missiyasını həyata keçirən KOBİA-nın oynadığı rol əhəmiyyətlidir. Biz qarşılıqlı tərəfdaşlığı daha da gücləndirmək niyyətindəyik” - deyə USAID-in Azərbaycan üzrə missiyasının direktoru Caydev Sinqx bildirib.

İmzalanma tədbiri çərçivəsində həmçinin, KOB sahəsində Agentlik və USAID arasında əməkdaşlıq perspektivlərinə, təcrübə mübadiləsinə, ABŞ-ın KOB sahəsi üzrə fəaliyyət göstərən qurumları ilə əlaqələrin inkişafına dair fikir mübadiləsi aparılıb.