![Qazaxda “Qırmızı Körpü” gömrük-sərhəd buraxılış məntəqəsində KOB dostu fəaliyyətə başlayıb](https://smb.gov.az/storage/10348/1.jpg)
Azərbaycanın “Qırmızı Körpü” gömrük-sərhəd buraxılış məntəqəsində fəaliyyət göstərəcək KOB dostu sahibkarlara idxal-ixrac əməliyyatları və gömrük prosedurları ilə bağlı informasiya, məsləhət və hüquqi yardım göstərəcək.
Qazax rayonunda Azərbaycan Respublikasının “Qırmızı Körpü” gömrük-sərhəd buraxılış məntəqəsində Kiçik və Orta Biznesin İnkişafı Agentliyinin (KOBİA) KOB dostu fəaliyyətə başlayıb.
KOBİA-nın İdarə Heyətinin sədri Orxan Məmmədov, Dövlət Gömrük Komitəsinin sədr müavini Cavad Qasımov və Qazax Rayon İcra Hakimiyyətinin başçısı Rəcəb Babaşov “Qırmızı Körpü” gömrük-sərhəd buraxılış məntəqəsində fəaliyyət göstərən KOB dostunun xidmət pəncərəsi ilə tanış olublar.
Məlumat verilib ki, mikro, kiçik və orta sahibkarlar gömrük xidmətlərindən istifadə edən zaman “Qırmızı Körpü” gömrük-sərhəd buraxılış məntəqəsində fəaliyyət göstərən KOB dostuna müraciət etməklə idxal-ixrac əməliyyatları, gömrük rəsmiləşdirilməsi və prosedurları ilə bağlı informasiya, məsləhət, hüquqi yardım kimi xidmətlərdən istifadə edə biləcəklər. KOB dostunun “Qırmızı Körpü” gömrük-sərhəd buraxılış məntəqəsində fəaliyyəti həmçinin, KOB-ların müvafiq sahə ilə bağlı müraciətlərinin KOBİA-nın və Dövlət Gömrük Komitəsinin iştirakı ilə dövlət-sahibkar əməkdaşlığı çərçivəsində operativ həll olunmasına imkan verəcək. Qeyd edək ki, bu, Dövlət Gömrük Komitəsinin xidməti ərazisində Bakı şəhərindən sonra KOB dostunun sayca 2-ci xidmət pəncərəsidir.
Bundan əvvəl 2019-cu ildə Bakı Baş Gömrük İdarəsində KOB dostunun xidmət pəncərəsi fəaliyyətə başlayıb.
Powered by Froala Editor